Il-Programm Akkademiku

F’Settembru tal-2019, il-BCJS addottat il-metodu, l-ethos u l-filosofija tal-Montessori fl-ambjent tal-Kinder. Il-metodu hekk imsejjaħ Montessori, li ġie żviluppat minn Dr Maria Montessori (1870 – 1952) huwa msejjes fuq il-ħsieb li wieħed għandu jipprovdi l-aktar ambjent pożittiv u armonjuż possibbli biex jitrawwam l-iżvilupp ħolistiku tat-tfal permezz tat-tagħlim b’mod indipendenti. Fl-aħħar mill-aħħar, dan iwitti t-triq għal ħajja rikka fl-esperjenzi u l-imħabba lejn it-tagħlim u l-esplorazzjoni.

It-tfal huma meqjusa bħala individwi, huma rispettati u jiġu mħeġġa li jitgħallmu u jesploraw bil-pass tagħhom permezz tax-xelta vasta t’attivitajiet li l-ambjent tal-Kinder joffri. Permezz ta’ osservazzjonijiet regolari min-naħa tal-edukaturi, l-ambjent tal-Kinder u l-attivitajiet innifishom jiġu magħżula apposta biex jindirizzaw il-bżonnijiet u l-interessi individwali ta’ kull tifel u tifla. Dan ifisser li l-ambjent u l-attivitajiet jinbidlu u jevolvu b’mod kontinwu biex jissapportjaw l-iżvilupp ta’ kull tifel u tifla.

L-attivitajiet li jiġu pprovduti huma hands-on u huma magħmulin b’tali mod li jiggwidaw lit-tfal fl-oqsma kollha tal-kurrikulu, iħaddmu l-kreattività, jinkoraġġixxu t-taħbil tal-moħħ kif ukoll joħolqu proċess ta’ tagħlim dinamiku u indipendenti, dejjem bil-gwida tal-edukaturi. L-attivitajiet ġodda normalment jiġu introdotti lil kull tifel u tifla b’mod individwali biex ikunu relevanti għall-istadju tal-iżvilupp tagħhom. It-tfal, imbagħad, ikunu liberi li jirrepetu l-attivitajiet li jkunu ġew introdotti b’mod indipendenti biex ikomplu jesploraw u jirfinaw il-kunċetti li jkunu ġew introdotti skont l-interess u l-bżonnijiet tagħhom.